మృత్యుంజయుడు - ఓ మంచి సినిమా

సినిమాకు వెళ్ళాలంటూ అనిల్ రెండు రోజుల నుంచి గొడవ చేస్తుంటే పని ఒత్తిడితో కలిగే అయిష్టతతోనే రాత్రి 9.50కి వరుణ్ ఐనాక్స్ కి బయలుదేరా. థియేటర్ లోకి వెళ్ళి సినిమా ప్రారంభం అయిన తరువాత కొద్ది సేపటికే అర్థమై పోయింది. అనిల్ గట్టిగా కోరి వుండకపోతే ఓ మంచి సినిమా చూడకుండానే వెళ్ళిపోయేదని. ధన్యవాదాలు అనిల్. 

రెండు గంటల 26నిమిషాల అరుదైన ఆంగ్ల సినిమా. 135మిలియన్ డాలర్లు ఖర్చుతో తయారై 430మిలియన్ డాలర్లుకు పైగా వసూలు చేసిన, చేస్తూన్న సినిమా ది రెవెనెన్ట్. కంప్యూటర్ గ్రాఫిక్ మాయాజాలానికి దూరంగా, సహజత్వానికి దగ్గరగా అత్యంత వ్యయప్రయాసలకు ఓర్చి తీసిన సినిమా. కెనెడా, అమెరికా, అర్జెంటీనాలలో ఈ సినిమా షూటింగ్ జరుపుకుంది. జపాన్ కు చెందన సంగీత దర్శకుడు సకమొటొ, జర్మనీకి చెందిన అల్వ నొటొ అందించిన సంగీతం ఆద్యంతం అద్భుతం. దర్శకుడు అలెజాండ్రొ జి ఇనారిటు అభినందనీయుడు. 

ఫ్రెంచ్, కెనడాలకు చెందిన జంతు చర్మాల వ్యాపారస్తులు అమెరికా మూలవాసుల జీవితాలను అల్లకల్లోలం చేసిన తీరును, ప్రళయ ప్రకృతిని తట్టుకుని నిలబడగలిగే మానవుని ఆత్మస్థైర్యాన్ని, మనిషిలోని పశుకోణాన్ని దర్శకుడు చెప్పిన తీరు మనల్ని లీనం చేస్తుంది. పగ - ప్రతీకారాలు, వ్యష్టి జీవేచ్ఛ తీసుకువచ్చే స్వార్థ చింతన, అది మనిషిని పతనావస్థలోకి నెట్టే తీరు అంతర్లీనంగా సాగుతూంటుంది. సంగీతం, దృశ్యం, మాట... మనపై ముప్పేట దాడి చేస్తాయి. రెప్ప వేయనీయకుండా కట్టి పడేస్తాయి. 

ఇదో అద్భుత దశ్య కావ్యం. వర్ణనకు అందని అమలిన చిత్రీకరణ ప్రాంతాల అందాలను తెరపై నిశ్శబ్ధంగా చూస్తూ ఆనందించాల్సిందే. కొన్నింటిని చాటటానికి పదాలు తడబడతాయి. 

అనిల్ మరిన్ని మంచి సినిమాలను చూపించే బాధ్యత నీదే సుమా.